பங்களாதேஷிற்கு எதிரான 2-ஆவது டெஸ்ட் போட்டியில் தமிம் இக்பால் விக்கெட்டை வீழ்த்திய தென்னாபிரிக்க வேகப்பந்து வீச்சாளர் டேல் ஸ்டெய்ன் டெஸ்ட் போட்டிகளில் 400-ஆவது விக்கெட்டைக் கைப்பற்றி சாதனை புரிந்தார்.
முத்தையா முரளிதரன் 72 டெஸ்ட்களில் 400 விக்கெட்டுகளை வீழ்த்தி முதலிடம் வகிக்க, நியூஸிலாந்தின் முன்னாள் வேகப்பந்து மேதை ரிச்சர்ட் ஹேட்லி 80 போட்டிகளில் 400 விக்கெட்டுகளைக் கைப்பற்ற தற்போது டேல் ஸ்டெய்ன் 80ஆ-வது டெஸ்ட் போட்டியில் 400ஆ-வது விக்கெட்டை வீழ்த்தி ஹேட்லியுடன் 2-ஆவது இடத்தைப் பகிர்ந்து கொண்டுள்ளார்.
அதே போல் டெஸ்ட் கிரிக்கெட்டில் 400 விக்கெட்டுகளைக் கைப்பற்றும் 13-ஆவது பந்துவீச்சாளர் ஆகிறார் ஸ்டெய்ன். ஷோன் போலாக்கிற்குப் பிறகு 400 விக்கெட்டுகள் மைல்கல்லை எட்டிய மற்றொரு தென்னாபிரிக்க வீரர் ஸ்டெய்ன்தான். ஸ்டெய்ன் விளையாடிய 79 டெஸ்ட் போட்டிகளில் தென்னாபிரிக்கா 61 போட்டிகளில் வெற்றி பெற்றுள்ளது தென்னாபிரிக்க டெஸ்ட் வெற்றியில் ஸ்டெய்னின் அபரிதமான பங்களிப்பை பறைசாற்றுகிறது.
மற்ற வீரர்களிடமிருந்து டேல் ஸ்டெய்னை பிரித்து வைப்பது எது என்பது பற்றி ஆலன் டொனால்ட் கூறிய போது, “அவரது திறமை, வேகம் மற்றும் உறுதி ஆகியவை அவரை அனைத்து கால சிறந்த வேகப்பந்து வீச்சாளராக மாற்றியுள்ளது. அவர் 500 விக்கெட்டுகளைக் கைப்பற்றுவார் என்று நம்புகிறேன்.
அதுதான் அவர் விரும்புவதும். இதைத்தான் ஸ்டெய்ன் என்னிடமும் கூறினார்” என்றார்.
